Jeremia 39
01In tiende moand van t negende joar van keunenk Sedekia van Juda zien bestuur, was keunenk Nebukadnessar van Babylonië mit zien haile leger noar Jeruzalem kommen en haar stad insloten.
02Op negende dag van vaaierde moand in t elfde joar, nammen ze stad mit geweld in.
03Legeraanvoerders van keunenk van Babylonië bezetten Middelpoort. Dat wazzen rabmag Nergal-Sareser oet Simmagir, rabsaris Nebusarechim, mit aander aanvoerders van keunenk van Babylonië.
04Dou keunenk Sedekia van Juda en ale soldoaten dit zagen, gingen ze der vandeur. Snaachts konden ze tou stad oet kommen bie kaant van keunenk zien toen langs, deur poort tussen baaide muren hèn. Ze nammen de wiek noar t Jordaandaal.
05Mor t leger van Chaldeeërs kwam heur achternoa en huil Sedekia in op vlakte van Jericho. Ze kregen hom te pakken en hai wer noar keunenk van Babylonië brocht in Bibla, in kontrainen van Hamat. Doar sprak keunenk t vonnes over heur oet.
06Sedekia zien zeuns luit e veur zien aigen ogen ombrengen, ook hoge heren van Juda luit e ofslachten.
07Sedekia zulm luit e ogen oetsteken, in kopern boeien sloagen en votbrengen noar Babel.
08Chaldeeërs stoken keunenk zien pelaais en hoezen van t volk in brand. Muren van Jeruzalem huilen ze omdeel.
09Wat ter nog van t volk over was in stad, en lu dij nait overlopen wazzen, transpetaaierde Nebuzaradan, kommedant van keunenk zien garde, noar Babylonië.
10 Bloots aarmste lu van t volk, mensken zunder bezit, luit Nebuzaradan, kommedant van keunenk zien garde, in t laand achter. Dij dee e droevetoenen en akkers.
11 Wat Jeremia aanbelangt: keunenk bestelde Nebuzaradan, kommedant van zien garde:
12 "Hol n oogje op Jeremia, zörg der veur dat hom niks overkomt en dou ales wat e vragt."
13 Nebuzaradan, kommedant van keunenk zien garde, gaf dizze odders deur aan rabsaris Nebusazban, aan rabmag Nergal-Sareser en aan aander aanvoerders van keunenk van Babylonië.
14 Ze huilen Jeremia oet t ketaaier van wacht en vertraauwden hom tou aan Gedalja, zeun van Achikam en klaainzeun van Safan. Dij nam hom mit noar hoes tou. Dat zodounde bleef Jeremia onder aigen volk.
15 Dou Jeremia nog in t ketaaier van wacht opsloten zat, kreeg e dit woord van de HEER:
16 "Zeg tegen Ebed-Melech oet Nubië: Dit zegt HEER van de machten, God van Israël: Ales wat ik over dizze stad zegd heb, loat ik gebeuren - tot zien ondergang en nait tot zien haail. Veur joen aigen ogen zel t gebeuren.
17 Mor joe red ik op dij dag - godssproak van de HEER. Ie zellen nait in handen valen van heur doar ie zo baang veur binnen.
18 Ik zel joe redden. Ie zellen nait omkommen deur t sweerd en brengen t ter leventeg òf. Omreden ie hebben vertraauwd op mie - godssproak van de HEER."
|
